कुमाउनी भाषा में हौर सालोंक चारि २०२० में चली लेखन पुरस्कार योजना

- जून 05, 2020

कुमाउनी भाषा में आज निरछव साहित्य लेखी जाणौ और कोई लै भाषा तबै अघिल बढ़ि सकैं जब उमें साहित्य लेखी जाओ।कुमाउनी भाषा आ्ब उरातार उन्नतीक तरब बढ़नै, य सब तबै हुणौ जब कुमाउनी में रचनाकारोंक तादाद बणनै। उसी तो कुमाउनी भाषाक अस्तित्वक सबूत हिंदी है बेर पैंलीक मिलनी पर कुछ कमी हमूं में रै हुनलि जो हमरि कुमाउनी हिंदी भाषाक चारि उन्नति न करि सकि।

जां कुछ सालों पैंली तक कुमाउनी में जादेतर सिरफ पद्य (कविता) देखींछी वांई आज कुमाउनी भाषा में साहित्यकि कहानी, उपन्यास, निबंध, लेख, निबंध, समालोचना व स्मारक साहित्य समेत साहित्यकि तमाम विधाओं में साहित्य लेखी जाणौ। दुखकि बात य लै छु कि हमरि नई पीढ़ी कुमाउनी भाषा बै दूर होते जाणै वांई कुछ बुद्धिजीवी कुमाउनी भाषा बिकासक जुगुत में लागि रईं।

आओ जाणनू कुमाउनी भाषाक बिकासै लिजी चलण लागी लेखन योजनाओंक बा्र में-

कुमाउनी भाषा बिकासकि लिजी एक पहल बर्ष २०१० बटी चलि रै। इन लेखन योजनाओं द्वारा २०१० बटी कुमाउनी भाषा साहित्यक बिकास में तेजी ऐ। नतिज य छु कि कुमाउनी में खूब साहित्य लेखीणौ ।

आओ बिस्तारल जाणनू य योजनाओं बार में -

कुमाउनी भाषा, साहित्य एवं संस्कृति प्रचार समिति कसारदेवी अल्मोड़ा व ‘पहरू’ कुमाउनी पत्रिका कसारदेवी अल्मोड़ा द्वारा डॉ. हयात सिंह रावत ज्यू ( समिति सचिव व संपादक ‘पहरू ‘ पत्रिका) नेतृत्व में २०१० बटी हर साल कुमाउनी भाषा साहित्य बिकासै लिजी कई बिधाओं में लेखन योजना चलाई जाणई।

• मधतगारोंक बदौलत चलनई यों लेखन पुरस्कार योजना -

यों लेखन योजनाओं कैं चलूणै लिजी हमरै समाजा्क कुछ मधतगार भाषा प्रेमियों द्वारा धनराशि दिई जैं। अलीबेर (२०२० में ) लै मधतगारों बदौलत समिति व ‘पहरू’ कुमाउनी पत्रिका द्वारा कुमाउनी भाषा में लेखन पुरस्कार योजना चलाई जानई।

• क्वे लै ल्हे सकूं लेखन योजनाओं में भाग -

इन योजनाओंक खाश बात य छु कि इन लेखन पुरस्कार योजनाओं में क्वे लै भाग ल्हि सकूं उमरक के प्रतिबंध न्हां, एकैं रचनाकार सबै लेखन योजनाओं में लै भाग ल्हि सकूं।

• कुमाउनी भाषा सम्मेलन में हुनी पुरस्कृत-

लेखन योजनाओं में तीन छांट (श्रेष्ठ) रचनाकारों कैं नवंबर महैण में हुणी तीन दिनी ‘राष्ट्रीय कुमाउनी भाषा सम्मेलन में पुरस्कार दिई जां ।

समिति व ‘पहरू’ पत्रिकाक मानण छू कि य लेखन योजनाओं द्वारा २०१० बटी कुमाउनी भाषा व साहित्यक बिकास में भल काम हुणौ, साहित्य खूब लेखीणौ। कुमाउनी भाषा तरक्की करनै ।