उत्तराखंडकि झांकी कैं मिलौ तिसर पुरस्कार
२६ जनवरी २०२१ हुं ७२ ऊं गणतंत्र दिवसक मौक पर राजधानी दिल्ली क राजपथ में हुणी परेड में य साल उत्तराखंडकि झांकी कैं तिसर पुरस्कार मिलौ। परेड में अलीबेर ३२ झांकी शामिल छी। १७ झांकी राज्य और केन्द्रशासित प्रदेशोंक छी, जनूमें उत्तराखंडकि झांकी कैं तिसर पुरस्कार मिलौ। पैंल पुरस्कार उत्तर प्रदेश व दुसर पुरस्कार त्रिपुरा झांकी कैं मिलौ। उत्तराखंडकि झांकी में राज्य पशु कस्तूरी मृग, राज्य पक्षी मोनाल, प्रसिद्ध केदारनाथ धाम, आदिगुरू शंकराचार्य, कलाकार, संत, जोगि खाश छी दगड़ै झांकी दगै आठ कलाकार उत्तराखंडकि बेशभूषा में नाच करण राछी। केदारनाथ मंदिर और वीक आसपासक पुर इलाक २०१३ में आई बिनाशकारी आपदाल बिखरि गोछी जकैं पछां नए टुक बै तैय्यार करी गोछी।
उत्तराखंडकि झांकी में हल्द्वाणिक ‘आंचल कला केन्द्र’क ११ कलाकार शामिल छी जनूमें ४ छात्र एम.बी.पी.जी. कॉलेज हल्द्ववाणिक छी। बुधबारक दिन देर रात केन्द्रीय युवा मामले और खेल मंत्री किरण रिजिजू ल उत्तराखंडाक कलाकारों कैं सम्मानित करौ। य जाणण लैक छु कि परेड में शामिल झांकियोंक पुरस्कारै लिजी चयन उनर प्रदर्शन, दर्शकोंक रुझान, उनर संगीत और कलाकारोंक प्रस्तुति आदि आधार पर करी जां।
टिप्पणियाँ