‘दीया’ ग्रुपल गरीब इस्कूली ना्नतिनोंकि मधत करै
ललित तुलेरा। बागस्यर। कपकोटक दूर इला्क में मौजूद रा. इ. कॉलेज चौड़ास्थल में 8 मार्च 2021 हुं ‘दीया’ ग्रुपल ग़रीब ज़रूरतमंद इस्कूली नानतिनों कैं पढ़ाइ- लिखाइक समान दि बेर मधत करै। दरअसल चौड़ास्थल बागस्यर शहर है बेर भौत दूर बसी छू जां ना नेटवर्क भलि कै पकड़न और ना इंटरनेट भली कै चलि सकन। जैक वजैल भौत से इस्कूली नानतिन टैक्नोलौजीक इस्तमाल नि करि पान। ‘दीया’ ग्रुपाक सदस्योंल इस्कूली नानतिनोंक बीच जै बेर जरूरतमंद नानाकि मधत करै। य इस्कूल में गरीबीक आलम य छु कि कुछेक ना्नतिन तो अापुण पढ़ाईक लिजी कौपि-किताब लै नी खरीद पान।
(‘दीया’ ग्रुपकि सदस्य रेनू टाकुली पठन सामग्री दि बेर इस्कूली नानतिनोंकि मधत करणै)
‘दीया’ ग्रुप समाज में य संदेश दिण चां कि आपुण लिजी तो हर क्वे इंसान जियूं पर एक इंसान हुणक नाते हमुकैं समाज में जरूरतमंदोंकि मधत करण चैं। य मौक पर ‘दीया’ ग्रुप द्वारा नानतिनोंक मार्गदर्शन लै करी गो, उनूकैं भलि- भलि बात बताई गेई। ‘दीया’ ग्रुप ऊणी वा्ल टैम में लै शिक्षाक क्षेत्र में दूर- दराजाक अभावों में जिणी ग़रीब व ज़रूरतमंद नानतिनोंक मधत करते रौल।
य मौक पर इस्कूलाक शिक्षक लोकपाल आर्य, विजय कुमार, अखिलेश चौहान, दयाल सिंह दानू, जीवन सिंह दानू, गंगा सिंह बसेड़ा, लक्ष्मण सिंह बसेड़ा, अंजना चौहान, रेनू टाकुली समेत हौर लोग मौजूद छी।
(कार्यक्रम में मौजूद नानतिनों दगै ‘दीया’ ग्रुपकि ग्रुप फोटो)
अगर आपूं लै ‘दीया’ ग्रुप दगै जुड़बेर ग़रीब नानतिनोंक मधत करण चांछा तो आपूं दीया ग्रुपक ‘गूगल पे’ नंबर में डबलोंकि मधत करि सकछा। य नंबर में आपूं बात लै करि सकछा।
• ‘दीया’ ग्रुप ‘गूगल पे’ व संपर्क नंबर- 9410590143
टिप्पणियाँ