कुमाउनी भाषा में इस वर्ष (२०२५) की नौ लेखन पुरस्कार योजनाएं
कुमाउनी भाषा, साहित्य एवं संस्कृति प्रचार समिति कसारदेवी, अल्मोड़ा व ‘पहरू’ कुमाउनी मासिक पत्रिका द्वारा साल 2010 बटी कुमाउनी भाषा में कुमाउनी साहित्य और भाषा बिकासै लिजी साहित्यकि तमाम बिधाओं में लेखन पुरस्कार योजना चलाई जानई। य लेखन योजनाओंल कुमाउनी में साहित्यकि नई गङ बगै। जां एक तरफ कुमाउनी साहित्य में नई-नई बिधाओं में कुमाउनी साहित्य लेखी जै सकौ, तो वांई कुमाउनी में लेखण-पढ़नक लै रिवाज बढ़ौ। नई लेखार लै सामणि आई और कुमाउनी में उरातार साहित्यक बिकास हुनै गो। कुमाउनी में गद्य और पद्य में आज जाधेतर साहित्य य लेखन योजनाओंकि लै उपज छु। य लेखन योजनाओंक बदौलतक कुमाउनीक कयेक लेखारोंल साहित्यक नई बिधाओं में कलम उठा।
अलीबेर (2025) लै हौर सालोंक चारि समिति व ‘पहरू’ पत्रिका द्वारा 09 लेखन योजना चलाई जानई। यों 09 लेखन पुरस्कार योजना यों छन-
०१.
कुँवर दलीप सिंह बिष्ट स्मृति बाल नाटक लेखन पुरस्कार योजना
बी.एस.एफ. बै रिटायर सूबेदार श्री रूप सिंह बिष्ट, रैथमी ग्रा.-तल्ली नाली, सेराघाट, जिला-अल्मोड़ा द्वारा दिई मधतल कुमाउनी भाषा में बाल नाटक लेखन कें बढ़ावा दिनै लिजी ‘कुँवर दलीप सिंह बिष्ट स्मृति बाल नाटक लेखन पुरस्कार योजना’ चलाई जनै। यो लेखन योजना में क्वे लै उमराक लेखार भाग ल्ही सकनी। हरेक प्रतिभागी कैं एक बाल नाटक भेजन छु। बाल नाटक मौलिक एवं अणछपी हुण चैं। प्राप्त बाल नाटकों बटी निर्णायक मंडल द्वारा तीन अब्बल बाल नाटकों कैं छांटी जा्ल और उनार लेखारों कैं समारोह में पुरस्कृत करी जा्ल व बाल नाटकों कैं ‘पहरू’ में छापी जा्ल।
०२.
अरूण कुमार भट्ट स्मृति रिपोर्ताज लेखन पुरस्कार योजना
‘कलावती साहित्य पुरस्कार ट्रस्ट’ अल्मोड़ा द्वारा दिई मधतल कुमाउनी भाषा में रिपोर्ताज विधा में लेखन कें बढ़ावा दिनै लिजी ‘अरूण कुमार भट्ट स्मृति रिपोर्ताज लेखन पुरस्कार योजना’ चलाई जनै। यो लेखन योजना में क्वे लै उमराक लेखार भाग ल्ही सकनी। रिपोर्ताज मौलिक एवं अणछपी हुण चैं। प्राप्त रचनाओं बटी निर्णायक मंडल द्वारा तीन अब्बल रचनाओं कैं छांटी जा्ल और उन रचनाकारों कैं समारोह में पुरस्कृत करी जा्ल व रचनाओं कैं ‘पहरू’ में छापी जा्ल।
०३.
तारा जोशी स्मृति लेखन पुरस्कार योजना
ब्रिगेडियर (से.नि.) धीरेश कुमार जोशी, निवासी- पीली कोठी, हल्द्वानी द्वारा आपणि इज (स्व. तारा जोशी, शिक्षिका) याद में दिई आर्थिक मधतल कुमाउनी भाषा में नानतिनोंक लेखन कैं बढ़ावा दिणै लिजी ‘तारा जोशी स्मृति लेखन पुरस्कार योजना’ चलाई जनै। यो योजना में अठार साल है कम उमराक नाननित भाग ल्ही सकनी। यो लेखन योजना में क्वे लै सामाजिक बिषय पर लेख, कहानि, निबंध, नाटक, यात्रा वृतांत, संस्मरण, कविता (05) लेखी जै सकनी। रचना अणछपी और मौलिक हुण चैं। प्राप्त रचनाओं बटी निर्णायक मंडल द्वारा अब्बल रचनाओं कैं छांटी जा्ल और उनर लेखारों कैं पुरस्कृत करी जा्ल व रचनाओं कैं ‘पहरू’ में छापी जा्ल।
०४.
शंकर लाल साह स्मृति कुमाउनी निबंध लेखन पुरस्कार योजना
श्रीमती चंद्र प्रभा साह, अल्मोड़ा द्वारा आपुण घरवावै याद में दिई आर्थिक मधतल कुमाउनी भाषा में निबंध लेखन कें बढ़ावा दिनै लिजी ‘शंकर लाल साह स्मृति कुमाउनी निबंध लेखन पुरस्कार योजना’ उरयाई जनै। बैज्ञानिक, साहित्यिक, सांस्कृतिक, राज्य, देश व बिश्व स्तरीय ज्वलंत समस्याओं आदि बिषयों बै क्वे एक बिषय पर निबंध लेखन छ। यो लेखन योजना में क्वे लै उमराक लेखार भाग ल्ही सकनी। हरेक प्रतिभागी कैं एक निबंध भेजन छ। निबंध मौलिक एवं अणछपी हुण चैं। प्राप्त निबंधों बटी निर्णायक मंडल द्वारा तीन अब्बल निबंधों कैं छांटी जा्ल और उनार लेखारों कैं समारोह में पुरस्कृत करी जा्ल और निबंधों कैं ‘पहरू’ में छापी जा्ल।
०५.
गोविन्द सिंह बिष्ट स्मृति शब्दचित्र लेखन पुरस्कार योजना
श्रीमती नीलम नेगी, से.नि. प्रधानाचार्य, मु.- चैधरीखोला, अल्मोड़ा द्वारा दिई मधतल कुमाउनी भाषा में शब्दचित्र विधा में लेखन कें बढ़ावा दिनै लिजी ‘गोविन्द सिंह बिष्ट (पूर्व विधायक) स्मृति शब्दचित्र लेखन पुरस्कार योजना’ चलाई जनै। यो लेखन योजना में क्वे लै उमराक लेखार भाग ल्ही सकनी। हरेक प्रतिभागी कें एक शब्दचित्र भेजन छ। शब्दचित्र मौलिक एवं अणछपी हुण चैं। प्राप्त शब्दचित्र रचनाओं बटी निर्णायक मंडल द्वारा तीन अब्बल शब्दचित्रों कैं छांटी जा्ल और उनार लेखारों कैं समारोह में पुरस्कृत करी जा्ल व शब्दचित्र ‘पहरू’ में छापी जा्ल।
०६.
इन्द्रसिंह रावत स्मृति कुमाउनी बाल कहानी पुरस्कार योजना
‘इन्द्रसिंह/आन सिंह सार्वजनिक न्यास’ झालडुंगरा (अल्मोड़ा) द्वारा दिई मधतल कुमाउनी भाषा में बालोपयोगी कहानी लेखन कैं बढ़ावा दिणै लिजी ‘इन्द्र सिंह रावत स्मृति कुमाउनी बाल कहानी लेखन पुरस्कार योजना’ आयोजित करी जनै। यो योजना में क्वे लै उमराक लेखार भाग ल्ही सकनी। बाल कहानी मौलिक एवं अणछपी हुण चैं। मिली कहानियों बटी निर्णायक मंडल द्वारा तीन अब्बल कहानियाें कैं छांटी जा्ल और उनार रचनाकारों कैं समारोह में पुरस्कृत करी जा्ल और रचनाओं कैं ‘पहरू’ में छापी जा्ल।
०७.
भारतेन्दु निर्मल जोशी स्मृति कुमाउनी समालोचना लेखन पुरस्कार योजना
श्री जगदीश जोशी, से.नि. शिक्षक, भगवानपुर जयसिंह, हल्द्वानी द्वारा दिई मधतल कुमाउनी भाषा में ‘समालोचना’ विधा में लेखन कें बढ़ावा दिनै लिजी ‘भारतेन्दु निर्मल जोशी स्मृति कुमाउनी समालोचना लेखन पुरस्कार योजना’ उरयाई जनै। यो योजना में क्वे लै उमराक लेखार भाग ल्ही सकनी। समालोचनात्मक लेख मौलिक एवं अणछपी हुण चैं। प्राप्त लेखों बटी निर्णायक मंडल द्वारा तीन अब्बल रचनाओं कैं छांटी जा्ल और उन रचनाकारों कैं समारोह में पुरस्कृत करी जा्ल और रचनाओं कैं ‘पहरू’ में छापी जा्ल।
०८.
बहादुर सिंह खनी स्मृति ब्यंग लेखन पुरस्कार योजना
श्री खुशालसिंह खनी, से.नि. शिक्षक, ग्राम नैनी, जागेश्वर, जिला अल्मोड़ा द्वारा दिई आर्थिक मधतल कुमाउनी भाषा में ‘ब्यंग’ लेखन कैं बढ़ावा दिनै लिजी ‘बहादुर सिंह खनी स्मृति ब्यंग लेखन पुरस्कार योजना’ उरयाई जनै। यो लेखन योजना में क्वे लै उमराक लेखार भाग ल्ही सकनी। ब्यंग मौलिक एवं अणछपी हुण चैं। प्राप्त ब्यंग रचनाओं बटी निर्णायक मंडल द्वारा तीन अब्बल रचनाओं कैं छांटी जाल और उन ब्यंग लेखारों कें एक समारोह में पुरस्कृत करी जा्ल और ब्यंग ‘पहरू’ में छापी जा्ल।
०९.
खीम सिंह ऐठाणी स्मृति कुमाउनी बाल कविता लेखन पुरस्कार योजना
श्री लक्ष्मण सिंह ऐठाणी, से.नि. जिला बेसिक शिक्षा अधिकारी, रैथमी- ग्रा.-भानी (भराड़ी), जि.-बागेश्वर, हाल-मल्ला चैसार, अल्मोड़ा द्वारा आपण बौज्यूकि याद में दिई आर्थिक मधतल कुमाउनी भाषा में बालोपयोगी कविता लेखन कें बढ़ावा दिणै लिजी ‘खीम सिंह ऐठाणी स्मृति कुमाउनी बाल कविता लेखन पुरस्कार योजना’ चलाई जनै। यो योजना में क्वे लै उमराक लेखार भाग ल्ही सकनी। बाल कविता मौलिक और अणछपी हुण चैनी। पुरस्कार योजना में 05 बाल कविता भेजण छन। प्राप्त रचनाओं बटी निर्णायक मंडल द्वारा तीन रचनाकारोंक रचनाओं कें छांटी जा्ल और उनार लेखारों कें समारोह में पुरस्कृत करी जा्ल और कविताओं कैं ‘पहरू’ में छापी जा्ल।
● रचना हातल लेखी या टाइप (kurtidev10 font) दुवै माध्यमों में स्वीकार छन।
● रचना भेजणकि आखिरी तारीख 30 सितंबर 2025 छु।
● रचना भेजणक पत्त -
संपादक-
‘पहरू’ कुमाउनी मासिक पत्रिका
इंद्रसदन, सुनारीनौला, अल्मोड़ा-263601
(उत्तराखंड)
● रचना ईमेल- pahru.uttarakhand@gmail.com में लै भेजी जै सकनी।
लेखन योजनाओं बै जुड़ी सकर जानकारी लिजी 'पहरू' वटसप/ मोबाइल नंबर पर संपर्क करिया- 9412924897
 |
टिप्पणियाँ