कुर्मांचल अखबार : कुमाउनीक पैंल साप्ताहिक अखबारक दस सालक सफर
25 जुलाई कुमाउनी भाषाक लिजी एक ऐतिहासिक दिन छु। किलैकी आज है दस साल पैंली 25 जुलाई 2011 हुं कुमाउनीक पैंल हफ्तवार अखबार 'कुर्मांचल अखबार' अल्माड़ बै छपौ। अखबारल 05 जुलाई 2021 हुणि आपण 10 सालक सफर पुर करि है। कुमाउनी पत्रकारिता इतिहास में य एक ठुल उपलब्धि में गणी जाण चैं कि कुमाउनी में दस सालों तलक हर हफ्त छपणी य पैंल और एकमात्र अखबार छु। यैक संपादक -डॉ. चंद्र प्रकाश फुलोरिया छन। कुमाउनी में आज तलक छपणी पत्र-पत्रिकाओंकि संख्या 10 है जादा छु, जनूमें मासिक ,फोल्डर पत्रिका, हस्तलिखित साइक्लोस्टाइल पत्रिका, ई- पत्रिका छन। कुमाउनी पत्रकारिता इतिहास में यैक अलावा ऐल तलक द्वी पत्रिका छन जनूल आपण 10 सालोंक सफर पुर करि रौ- 'दुदबोलि' ( तिमाइ / बाद में सलाना) व 'पहरू' (मासिक पत्रिका)।
हर हफ्त अखबार निकालण क्वे बौं हातक खेल तो न्हें, फिर य काम और लै कठिन है जांछ जब य आजक शोसल मीडिया जमा्न में निकाली जाओ। डबलोंक, पाठकोंक भेजणकि ब्यवस्ता करण भौत कठिन करम छु। य कुमाउनी समाजाक उ लोगनक लिजी लै जबाब छु जो कुमाउनीक लिजी नाकारात्मक सवाल करनी, काटिणि करनी। जो य लै कूंछी की कुमाउनी में क्वे पत्र-पत्रिका लंब टैम तलक नि निकलि सकन।
आश करण चैं कि 'कुर्मांचल अखबार' कैं कुमाउनीयोंक खूब लाड़ मिलल और कुमाउनी आपण बिकासक बा्ट हिटलि।
● कि आपूं नि जुड़न चाला 'कुर्मांचल अखबार' दगाड़?
यैक सालाना सदस्यता 200 रूपैं छु।
● आपूं चिट्ठी लै भेजि सकछा-
'कुर्मांचल अखबार' द्वारा नवल प्रिंटर्स, नंदादेवी बाजार, अल्मोड़ा-263601 (उत्तराखंड)
● मो.- +91 78300 39032
टिप्पणियाँ